هذا على الشهيبة يا لحباب..
مقالات
20 10 2019 - 23:07
482 قراءة


كان عندنا ف الدرب واحد الشيخ كبير ف لعمر وفاهم مزيان،
مجرب، معاشر، يخمم قبل ما يتكلم،
احكى لنا واحد النهار قصة.. ما زال كل مشتة نتفكرها
كل مشتة نبدل النعناع بالشهيبة مين نحرگ براد أتاي..

..

گال لنا الله يرحمو، الشهيبة يا وليداتي قصتها قصة..
كان ف واحد الزمان ف بلاد العلجان،
حملة على الشهيبة..
تهموها بالعار وغدر النصارى والعربان..

كتبوا عليها الكتاب،
احكى عليها إيميل زولا فلاسوموار(1)
«خمارة مريبة» بلغة العربان..
ويگولوا عليها هبلت فنانَا كبار..
من بينهم فان غوخ(2)،
ذاك اللي گص وذنو،
وهداها للخليلتو انتاع ليلة..
مدحت لو وذنو ف ذيك الليلة..
ومع حديث لوسادة ما رادة بال..
فن غوخ كان يعطي لكل كلمة قيمتها..
ويوزنها ف ميزان الذهب الثمين..
ارجع لها ف الصباح و دق الباب وراس مرزز،
قدم لها هدية الگلب
الطفلة تفولجت وارمات لهدية لملوثة بالدم صارخة:
هاذي دقة الشهيبة يا المجنون..
وبلعت الباب ف وجه المصدوم!
..
هاذي اكثر من زوج قرون تبالى بالشهيبة الطبا والفاهمين
لوي باستور وكلود برنار (3)
ناس ف العلم م لخيار..
دايرين بهم علماء كبار
وقساوس وكثير من التجار
شكلوا رابطات تحارب كل أنواع المسكرات..
خمرة وحشيش، وتمرة وتينة وروز وشهيبة يابسة ولا خضرة..
بصح الحملة.. ركزت غي على عصير الشهيبة اللي تخرج لعقل..

تْزامن استعمار بلادنا من لگور، مع حملة لمكر..
ففرانسا تلاومت للسن: علما ورجال دين وفلاحة،
باش يحاربو الشهيبة المشبوهة،
مجننة الرزين و لمهور..
موالين ادوالي مع رابطة محاربة الكحوليات فباريس تظاهروا،
ف 1907 بالضبط وكانوا يرددوا : «كلشي مع الخمر، وضد الشهيبة»
عام من بعد، تكونت جماعة في مجلس الشيوخ سمات روحها:
«فريق آنتي آلكوليك» (4)
طالبوا بمنع الشهيبة اللي احنا عندنا حبيبة..
بصح احنا ما نعصروها ما نخمروها..
والفاهمين غي فريـّع يغطسوه ف الماء طايب..
ويغطسوه فالبراد ويگلعوه من بعد لگليب..

و هكذا.. سويسرا من 1910 ، وفرانسا من 1915
ودول كثيرة ف أوروبا..
منعوا الشهيبة المعصرة، المخمرة.
اللي يدافعوا ع القيم يگولوا عليها باللي :
هاذ المجرمة تهبل
وترد بنادم حيوان
وتهدد مستقبل عصر لمـّم!!

تجار مشروب الشهيبة داروا فايت..
وفي فترة منع الشهيبة، ظهرت معصرات أخرى
وبنفس «المنيرة» ولاوا يعصروا البسباس ..
وتطورت لحوال ..
وزادوا لهم ف درجة الكحول من 30 حتى ل 45 درجة..
وهكذا بول ريكار(5) خرج الباستيس..

ف 1988 واحد لوزبر يسميوه ميشال روكار(6)،
اشتراكي.. هو اللي گال على المهاجرين :
«ما غادينش نستقبلوا گاع الميزيرية انتاع العالم.».
هذا لوزير الأول انتاع ميتران(7)، ما طولش،
قرّقوها فيه لمجاذيب..
اسمح بإدخال جزئية نشطة يسميوها توييون ف المشروبات والتغذية.
..
على حساب فهامتي الشهيبة غادي توليلها هيبتها..
ويسمحوا لها باش تخرج عقول اللي ما يعرفولهاش..
احضيوا راسكم يا الشبابية،
ما تكثروq الشهيبة ف البراد،
ما تخمروها ما تگطروها..
اويكما يگولوا عندنا:
الذيب حلال، الذيب حرام، الترك احسن..
..
مات شيخنا العالم لكبير بالدين والدنيا،
لقريب م الصغير ولكبير،
لقى اللي يحيي وما يموت،
لعزيز رب لعرش لعظيم..
وخلى لنا، شيخنا، اعرارم وصايا،
خير م لمسيد الصغير ولكبير..
..
من بعد، لگور ولاوا لطبايعهم
أوروبا ومشرعها لكبير،
قرروا باش يكون للشهيبة تدبير..
وتفتحت خمارات ف لمدن لكبيرة،
ما تتعجبش إلى سمعت الشهيبة تعصرت وتخمرت
باش تعصر وتخمر لعقول..
وإلى عرضك شي واحد "للبغاء"
ولا" للجنية الخضراء"
ولا "خضورية الشهيبة"
گول لو : الشهيبة كي التمرة
والكرموسة والعنبة،...
أنا نفضلهم م الشجرة للفم،
ماشي معصورين مگطرين مخمرين..

وبالسلامة يا لحباب.. قصايد شيخنا كثيرة..
تنور لبصار.. وداوي السقيم..
وتفوج على لحزين ولمبلي وتسكت لمفولج والرزين..

* (منقحة ومصححة).. نشرت لأول مرة بموقع أحفير أوروبا بناريخ 2014.01.01
..
(1) Emile Zola , L'Assommoir
(2) Vincent van Gogh
(3) Louis Pasteur et Claude Bernard
(4) Groupe anti-alcoolique
(5) Paul Ricard, inventeur du Pastis
(6) Michel Rocard
(7) François Mitterrand
(8) Thuyone


art. n° 1051











معلومات
للإتصال بنا
إتصل ب akae
باريس ~ فرنسا
ici.ahfir@gmail.com
© 2019 - akae.ahfir.eu