من ذكريات القنت : أحمد لمتيـــّم
مقالات
20 10 2019 - 23:56
545 قراءة


أحفير زمان كانت دروب وقنوت
كل قنت كان الشباب فيه يتلايم
يتبادل نگير و تقشاب و حكايات
وقصص لغرام بالطـبيعة دايما حاضرة
نحكي لكم يا لحباب على احمد مول الدمعات
احمد يا ناس فقير.. وسيم ودايما انقي
المشطة بالفرقة.. والصباط يلهگ
دايما لاعب ضاحك.. ودايما يدندن
مبلي بزوج بليات بالقدر
مبلي بالشعبي ولقصايد
ومبلي بالسبسي الله يعفو
والإنسان يا فلان
إلى كان مبلي هاذ البليات
وطاح ف لغرام.. مين ينظم
يبكـّي لعنايس ف لخيام
مين تفوت لحبيبة اللي متيمة احمد
الدم في عروگو يجمد
وعيونو الكوحل يتغرغروا بالدموع
الواغش يسكتو.. يعرفوا سر المولوع
ويگولوا الليلة ليلة احمد
يجينا مسلح بالعشبة
وفيها عيدان طول الليلة
وفيها قجورة وشقوفة..
واسقط يا ما تسقط..
ودندن ياما دندن..
وانضم ياما تنضم..
دموعو تسيل وتسيـّل دموع

واحد الليلة سبقها مرور لخليلة علينا
بعد ما ضرب عيدان
حكايتو بدات من غيليزان
ووصلت القصبة وباب الواد.. وبدا ينـْضم :
"
جوهرة.. ياقوتة
زمرذجة..
مرجانة مرجاااانة مرجانة مرجاااانة
لويزة معيرة.. ما كسبوها نااااس
مااا كسبوها ناااس
مخنطرة، مگدودة
شابة ومزيانة
مزيانة مزياااانة مزيانة
"
وحجرشة الصوت والبكا
خلاتنا نرأف لحال صديقنا
تمديد "الليف" بالرغم
يخلي لغزل يولي نواح
والقصيدة حزينة رثا
نحاول نهدؤوه يخزر فينا وينضم:
"
خمرة مغدرة.. ممزوجة في كاااس
ممزوجة في كااااااس
"
يهزز ويدور راسو.. والبسمة واسعة
ويزيد يحنن
"
واللي شافها.. واللي شافهااا
ما يصبرش خلااااص
ما يصبرش خلاااااااص
دان دادن دددادن
دان دادن دددادن
ما يصبرش خلاااااااص
..."
يعنگنا أحمد.. ويهمس بالبكا
راها قاتلتني يا لخوت
راها مكملتني يا لحباب

فاتت ليام وكبرنا فالعمر..
اللي مات مات
واللي تغرب تغرب
والحبيبة تزوجت وگطعت لبحر
احمد تاب وهرس السبسي
تزوج وتاب وراه اليوم يهدي
ولـّى فقيه مشارط
الفوگ ف الجبل
يرگب على أحفير
يا ترى يكون يتفكر بحالي
يگولوا الحب اللوّل ما يتحول
ولحنين يبقى دايما للقنت اللوّل

- نشرت بموقع أحفير أوروبا بتاريخ 2014.01.03
..
* القصيدة التي كان يردد بعض أبياتها صديقنا أحمد هي للمرحوم الهاشمي گرباوي : جوهرة..


art. n° 1053



-40
30.10.2019 - 17:10
برافو استاد عبدالحليم رجعتنا إلى زمان المحبة والأخلاق والاحترام وزين المريولات الحايك والحشمة والغرام وواحد يبرد الواحد بالسمع والشقف لمعلكين إلى هي حوت انا عنقروش تحياتي استاد
coment. n° 45









معلومات
للإتصال بنا
إتصل ب akae
باريس ~ فرنسا
ici.ahfir@gmail.com
© 2019 - akae.ahfir.eu